Akuzon Agim Veliu: Rrena për përçarjen e LDK-së në Llap u lëshua nga Vetëvendosje!

Kryetari i Komunës së Podujevës dhe nënkryetar i LDK-së, Agim Veliu ka reaguar ndaj një lajmi të publikuar sot në disa media, se “27 kryetarë të nëndegëve kanë dhënë dorëheqje”, duke pohuar se LDK në Llap as nuk luhatet e as nuk përçahet, nga lajme që sajohen në kuzhinat anti-LDK.

“Ndërsa, sot për të mos u mjaftuar me kaq, ky portal paska plasuar një rrenë të madhe, me gjuhën e mediave ‘fake news’, për kinse përçarjen e madhe në Degën e LDK-së në Podujevë, e që, sipas portalit, ‘27 kryetarë të nëndegëve na paskan dhënë dorëheqje’”, ka shkruar Veliu në Facebook.

Postimi i Veliut në Facebook:

Në epokën e shumësisë së mediave online, një portal lokal në Podujevë, me pronar një këshilltar komunal dhe kandidat për deputet në zgjedhjet e fundit nacionale nga Lëvizja Vetëvendosje, në vazhdimësi propagandon dhe plason lajme që atakojnë administratën komunale në Podujevë, veçmas ekzekutivin dhe kryetarin e Komunës, por edhe LDK-në.

Ndërsa, sot për të mos u mjaftuar me kaq, ky portal paska plasuar një rrenë të madhe, me gjuhën e mediave ‘fake news’, për kinse përçarjen e madhe në Degën e LDK-së në Podujevë, e që, sipas portalit, “27 kryetarë të nëndegëve na paskan dhënë dorëheqje”.

“Lajmi” i plasuar sot nga ky portal, e të cilin shpejt e konsumuan edhe portale të tjera, madje edhe nga ato që konsiderohen si serioze e të besueshme, nuk është kurrgjë tjetër veç një shpifje dhe rrenë, të cilën nuk do ta besojë askush.

Pavarësisht, se kush është porositësi, e kush sajuesi i  kësaj të pavërtete, atyre që dëshirojnë përçarjen dhe destabilizimin e partisë kryesore në Llap, ua bëjmë me dije se LDK në Llap, u ka rezistuar edhe mësymjeve më të forta nga rivalët politikë, prandaj as nuk luhatet e as nuk përçahet, nga lajme që sajohen në kuzhinat anti-LDK.

Dega jonë gjithmonë ka funksionuar e organizuar mirë dhe ka korrur vetëm fitore. Për këto rezultate meritë kryesore ka struktura dhe aktivistët e saj anekënd në Llap.

E tillë do të mbetet gjithmonë.

Prandaj, ftojmë strukturat, anëtarët dhe simpatizantët, të mos të bien pre e lajmeve të rreme, të cilat kanë qëllim që ta dëmtojnë LDK-në.